*Limpeza de sangue* (ou *sangue fai ruído*), de Rubén Ruibal, foi a obra gañadora do XIV Premio Álvaro Cunqueiro de Textos Teatrais en 2005. Os seus protagonistas, Fernando e Pantaleón —procedentes de mundos aparentemente opostos—, coinciden na sala de diálise dun hospital mentres agardan polo seu transplante ou polo inevitable desenlace. Igualados pola situación e obrigados a facerse compañía, sofren as consecuencias doutros aspectos da vida aos que a rutina diaria non lles permite prestar atención. Así, xorde unha amizade inimaxinable, mentres todo ao seu redor segue o seu funcionamento obsesivo, prexuizoso e sistemático; nin sequera unha proposta inocente, tomada de *O príncipe e o mendigo* de Mark Twain, logra abrir unha nova porta.